മറൈൻ വേൾഡ് - ചാവക്കാട്

2022 April 3

നമ്മുടെ കേരളത്തിൽ തൃശൂർ ജില്ലയിൽ ചാവക്കാട് അടുത്ത് പഞ്ചവടി കടൽത്തീരത്ത് ഭീമൻ മത്സ്യങ്ങൾ നീന്തിതുടിക്കുന്ന ഇന്ത്യയിലെ തന്നെ ഏറ്റവും വലിയ മറൈൻ അക്വേറിയം .  നാല് ഏക്കർ സ്ഥലത്ത് ഏതാണ്ട് 14 വർഷം കൊണ്ടാണ് ഇതിന്റ പണി പൂർത്തീകരിച്ചത്.

 അന്താരാഷ്ട്ര നിലവാരത്തിലുള്ള അക്വേറിയങ്ങൾ. വ്യത്യസ്തമായ ഇനങ്ങളിലുള്ള മത്സ്യങ്ങൾ. ഫിഷ് തെറാപ്പി, ഫിഷ് ഫീഡിങ്, കുട്ടികൾക്കായുള്ള പാർക്കുകൾ, ഗൈമുകൾ,3D തിയേറ്റർ, സ്കൂബ ഡൈവിങ്, ടണൽ അക്വെറിയം, റെയിൻ ഫോറസ്റ്റ്, കോഫി ഹൌസ്, റസ്റ്റോറന്റ് തുടങ്ങി നിരവധി ആകർഷണങ്ങൾ അതിനുള്ളിലുണ്ട്

ഉള്ളിലേക്ക് കയറുമ്പോൾ ആദ്യമായി കാണുന്ന ഭാഗമാണിത്. കൃത്രിമമായ അരുവികളും വെള്ളച്ചാട്ടങ്ങളും നൂറുകണക്കിന് വ്യത്യസ്തമായ മത്സ്യങ്ങളും. ഫിഷ് തെറാപ്പിയും ഒക്കെയാണ് ഈ പ്രദേശത്ത്ഒ കാഴ്ചക്കാർക്കായി ഒരുക്കിയിരിക്കുന്നത്.

 പിന്നീട് ഉള്ളിലേക്ക് കയറുന്തോറും വിസ്മയിപ്പിക്കുന്ന കാഴ്ചകളാണ് കാണാൻ സാധിക്കുന്നത്. കൃത്രിമമായ ഒരു വനാന്തരീക്ഷം വളരെ ഭംഗിയായി ഒരുക്കിയിരിക്കുന്നു. ചീവീടുകളുടെയും വെള്ളച്ചാട്ടങ്ങളുടെ യും കാട്ടരുവികളുടെയും ശബ്ദങ്ങളും വള്ളിപ്പടർപ്പുകളും വൻമരങ്ങളും നടുവിലായി ഒരു പുഴയും പുഴയിലാകെ വൻമത്സ്യങ്ങളും ഒക്കെയുണ്ട്.

മുഖ്യമായ ആകർഷണം വലിയ ടണൽ അക്വേറിയം ആണ്. വലിപ്പമേറിയ കുറെയധികം മത്സ്യങ്ങൾ ഇതിനുള്ളിലുണ്ട്.

അവക്ക് ഇടയിലൂടെ മുഴുവൻ സമയവും സ്കൂബ ഡൈവിങ് ആയി ഒരാളും.

മീനുകൾക്കുള്ള തീറ്റയായി അരികിലേക്ക് ചെല്ലുമ്പോൾ കൈകളിലേക്ക് ചാടിക്കയറുന്ന ചെറുമത്സ്യങ്ങളും ഇവിടം ഒരിക്കലും മറക്കാത്ത ഒരു അനുഭവം കാഴ്ചക്കാർക്ക് സമ്മാനിക്കുന്നു 

കുട്ടികൾക്കും മുതിർന്നവർക്കും ഒരുപോലെ ആസ്വദിക്കാവുന്ന അനേകം കൗതുകങ്ങൾ നിറഞ്ഞ ഈ അത്ഭുത ലോകത്തിലേക്ക് 350 രൂപയാണ് ടിക്കറ്റ് നിരക്ക്. കുട്ടികൾക്ക് 250 രൂപയും.

കൃത്രിമമായി സൃഷ്ടിച്ചെടുത്ത അന്തരീക്ഷവും വെള്ളച്ചാട്ടങ്ങളും കാട്ടരുവികളും പുൽമേടുകളും വള്ളിപ്പടർപ്പുകളും എല്ലാം ആസ്വാദകരുടെ മനം കവരുന്നതാണ്. 

പാലക്കാട് കോട്ട

പാലക്കാട്‌ ടിപ്പു സുൽത്താൻ കൊട്ട

2022 feb 19

പാലക്കാട് നഗരത്തിലെ ഹൃദയഭാഗത്തായി സ്ഥിതി ചെയ്യുന്ന ഈ ടിപ്പു സുൽത്താൻ കോട്ട പാലക്കാട് കോട്ട എന്നറിയപ്പെടുന്നു.

മൈസൂർ രാജാവായിരുന്ന ഹൈദരലി 1760കളിൽ പണികഴിപ്പിച്ച ഈ കോട്ട പിന്നീട് ബ്രിട്ടീഷുകാർ പിടിച്ചെടുക്കുകയും പുനരുദ്ധരിക്കുകയും ചെയ്തു.

പല വീരകഥകൾ ക്കും സാക്ഷിയായ ഈ കോട്ട ഇന്ന് ആർക്കിയോളജിക്കൽ സർവേ ഓഫ് ഇന്ത്യ സംരക്ഷിച്ചുപോരുന്നു.

ചുറ്റുമുള്ള ജലാശയവും ഉദ്യാനവും തണൽമരങ്ങളും എല്ലാം ശാന്തമായ ഒരു അന്തരീക്ഷം കാഴ്ചക്കാർക്ക് സമ്മാനിക്കുന്നു.

കൂറ്റൻ കരിങ്കൽ കെട്ടുകൾ കൊണ്ടുള്ള ഈ കോട്ടയുടെ നിർമ്മിതി അത്ഭുതപ്പെടുത്തുന്നതാണ്.

 കോട്ടയ്ക്കകത്ത് ആയി പ്രശസ്തമായ ഒരു ഹനുമാൻ ക്ഷേത്രവുമുണ്ട്.

പലതരത്തിലുള്ള ആളുകൾ മനോഹരമായ ഇവിടം ആസ്വദിക്കാൻ ആയി എത്തുന്നു. പ്രഭാതസവാരിക്കും വ്യായാമങ്ങൾക്കുമായി ഇവിടെ എത്തുന്നവരും നിരവധിയാണ്.

ശക്തൻ തമ്പുരാൻ കൊട്ടാരം

രാമവർമ ശക്തൻ തമ്പുരാൻ കൊട്ടാരം - തൃശൂർ 
Shakthan thamburan palace


 

ദൈവത്തിന്റെ സ്വന്തം നാടിന്റെ സാംസ്കാരിക തലസ്ഥാനമെന്ന് പേര്കേട്ട തൃശൂർ . ഒരു നാടിന്റെ സംസ്കാരവും പൈതൃകവും ഒന്നു ചേരുന്ന തൃശ്ശൂരിൽ മേളക്കൊഴുപ്പും പൂരവും ചരിത്രവും പൈതൃകവും എല്ലാം  ആനപ്രേമികളെയും സഞ്ചാരികളെയും ചരിത്രാന്വേഷികളെയുമെല്ലാം ആകർഷിക്കുന്നു.

തൃശൂർ നഗരത്തിന്റെ നടുവിലായി തലയുയർത്തി നിൽക്കുന്നൊരു കൊട്ടാരം.നമ്മുടെ നാടിന്റെ മണ്മറഞ്ഞ സംസ്കാരത്തെയും പൈതൃകത്തെയും എല്ലാം എത്ര ഭംഗിയാണ് ഇവിടെ സൂക്ഷിച്ചു വെച്ചിരിക്കുന്നത്. 

 കൊച്ചിയുടെ ലഘു ചരിത്രം 

കൊച്ചി രാജ്യത്തിന്റെ ഭരണസിരാകേന്ദ്രമായിരുന്നു ഇവിടം. കേരളീയവും ഡച്ചുമാതൃകയിൽ ഉള്ളതുമായ രണ്ടു തരം വാസ്തുശില്പകലയിൽ ഉള്ള നിർമിതിയാണ് ഈ കൊട്ടാരം.

 കൊട്ടാരവളപ്പിലെ മറ്റു നിർമ്മിതികളും പൈതൃക ഉദ്യാനവും മ്യൂസിയത്തിന് ഉള്ളിലെ വസ്തുക്കളുമെല്ലാം മുൻകഴിഞ്ഞു പോയ തലമുറകളുടെ പെരുമ നമുക്ക് വ്യക്തമാക്കിതരുന്നു.

 ഓരോ വസ്തുക്കൾക്കും അതിന്റെതായ ചരിത്രമുണ്ട്. ഓരോന്നിനെ കുറിച്ചും വ്യക്തമായ വിവരങ്ങളും ഇവിടെ രേഖപ്പെടുത്തിയിട്ടുണ്ട്. പുരാതനകാലത്തെ പല അടയാളങ്ങളും നാണയങ്ങളും ആയുധങ്ങളും പാത്രങ്ങളും അങ്ങനെ പലതും ഇവിടെ എന്നും അതിന്റെ പെരുമയോടെ തന്നെ സൂക്ഷിച്ചിരിക്കുന്നു 

നല്ല രീതിയിൽ ശ്രദ്ധയോടെ സൂക്ഷിച്ചിരിക്കുന്ന രാജകീയ വസ്തുക്കളും പുരാവസ്തുക്കളും ഇവിടെയുണ്ട്.

Shakthan thamburan 🔥

ആധുനിക കൊച്ചിയുടെ സൃഷ്ടാവ് എന്നറിയപ്പെടുന്ന ശക്തൻതമ്പുരാൻ അനേകം പുതിയ നിരത്തുകളും പാലങ്ങളും മറ്റും പണിതീർത്തു. വഴിയമ്പലങ്ങളും തണ്ണീർ പന്തലുകൾളും ഉണ്ടാക്കി. രാജ്യസുരക്ഷയ്ക്കായി സൈന്യത്തിൽ താഴ്ന്ന ജാതിക്കാരെ ഉൾപ്പെടുത്തിക്കൊണ്ട് സേനയെ ശക്തമാക്കിയതും ഇദ്ദേഹത്തിന്റെ വിപ്ലവകരമായ പ്രവർത്തനങ്ങളിൽ ഒന്നായിരുന്നു.

മൺമറഞ്ഞുപോയ സംസ്കാരത്തിന്റെ ചരിത്രശേഷിപ്പുകൾ പലതും നമുക്ക് ഇവിടെ കാണാനാകും.

കുടക്കല്ല് 

 പൈതൃക ഉദ്യാനം

കൊട്ടാ‍രത്തിനോട് അനുബന്ധിച്ച് ഒരു ഉദ്യാനവും സർപ്പകാവും ഉണ്ട് . കൊട്ടാരത്തിലെ ഈ ഉദ്യാനത്തോട് അനുബന്ധിച്ച് ഒരു വലിയ കുളമുണ്ട് . വടക്കേച്ചിറ എന്നാണ് അറിയപ്പെടുന്നത്.

പുരാവസ്തു വകുപ്പിന്റെ സംരക്ഷണയിലുള്ള ഈ കൊട്ടാരം ഇപ്പോൾ സന്ദർശകർക്കായി തുറന്നുകൊടുക്കുന്നുണ്ട്.

 വടക്കേച്ചിറ

കഠിന വേനൽകാലത്തും വറ്റാത്ത ഈ കുളം തൃശൂർ നഗരത്തിന്റെ പ്രധാന കുടിവെള്ള പദ്ധതികളിൽ ഉൾപ്പെട്ടതാ‍ണ്. 
 

ഈ നഗരത്തിരക്കുകൾക്ക് നടുവിലായി മനസ്സിനെയും ശരീരത്തെയും ഒരുപോലെ തണുപ്പിക്കാൻ സാധ്യമായ മറ്റൊരു സ്ഥലം ഉണ്ടാകുമെന്ന് തോന്നുന്നില്ല. അത്രയും ശാന്തമായ അന്തരീക്ഷം ആണ് ഇവിടം. പ്രത്യേകിച്ച് ഒറ്റയ്ക്കുള്ള യാത്രകളിൽ ഏറെ സമയം ശാന്തമായി ചിലവഴിക്കാൻ പറ്റിയ ഒരിടം.

യാത്രകൾ കേവലം ആസ്വാദനത്തിന്റേത് മാത്രമല്ല. ഓരോ യാത്രകളും കണ്ണും മനസ്സും തുറന്നുവെച്ച് അന്വേഷണങ്ങൾക്കും അറിവിനും വേണ്ടിയുള്ളതാകട്ടെ. ❣️