വാകപ്പൂക്കൾ

വാകപ്പൂവിതളുകളിൽ നീയൊളിപ്പിച്ച വരികൾ
എൻ ഹൃദയത്തിലേന്നേ കുറിച്ചിട്ട കവിതകൾ
രക്തപുഷ്പത്തിൻ ദളങ്ങളാൽ നീയൊരുക്കിയ
ദൃശ്യ കൗതുകം അന്നത്രമേൽ വിസ്മയം

കൈവിരൽ തുമ്പിൽ നീ തീർത്ത ദളങ്ങൾ
എൻ മനസ്സിലൊരാനന്ദമായിരുന്നെങ്കിലും
പരിഹാസമോതി നടന്നു നീങ്ങുമ്പോഴും നിൻ
കുറുമ്പും കുസൃതിയും കുളിരുള്ള തെന്നലായ്

മനസ്സിലെ മോഹം തളിർക്കുന്ന കാലത്ത്
ചങ്ങാതിമാരൊപ്പമോടിക്കളിക്കവേ
വാകപ്പൂവിതൾ തീർത്ത രാക്ഷസമുന കാട്ടി
മനസിലന്നെന്നിലൊരു മഴവില്ലു തീർത്തുനീ

പഠനവും പ്രണയവുമുദിച്ചുള്ള വാടിയായ്
മധുരം നുകർന്ന കലാലയ താഴ്‌വര
വീണ്ടുമാ കാലം കൊതിക്കുന്നു ഇന്ന്ഞാൻ
മിഴിനീരിലോടുമൊരു കടലാസുതോണിപോൽ

ലക്ഷ്യം

ലക്ഷ്യമില്ലാതെ ഈ തോണി നീങ്ങുന്നു 

ഒരിക്കൽ കണ്ടിരുന്ന സ്വപ്നങ്ങളിൽ ഇന്ന്  നിഴൽ വീണുകൊണ്ടിരിക്കുന്നു 

പ്രതീക്ഷയെന്നു തോന്നിയ തുരുത്തുകളെല്ലാം ഇന്ന് മൂടപ്പെട്ടിരിക്കുന്നു 

യാത്ര തുടർന്നല്ലേ പറ്റു. 

ആഗ്രഹിച്ചതിനെ ചിലപ്പോൾ സാഹചര്യം തട്ടിമാറ്റുമെന്ന് തോന്നും. പക്ഷേ പിന്മാറുന്നുവെന്ന് തോന്നുന്നിടത്ത് നമ്മളാശിച്ചത് നമ്മളെ തേടിയെത്തും.
ഒരുപക്ഷെ അതിലുമപ്പുറം .