ഓർമച്ചെപ്പ്

നിനച്ചിരിക്കാതെയെൻ മുന്നിലിന്നൊരു
ഓർമ്മച്ചെപ്പുമായവൾ വന്നുനിന്നു

മുഖാവരണത്തിന് ആ പുഞ്ചിരിയെ ഒളിപ്പിക്കാനായേക്കാം
മിഴികളിലെ തിളക്കം എന്നെ കാലമൊരല്പം പിന്നോട്ടുനടത്തിച്ചു

ഒരുവട്ടമെന്മനമാ വാകമരച്ചോട്ടിലെ
കുഞ്ഞിക്കുസൃതിയെത്തേടിയെത്തി
അന്ന് നടന്നൊരാ കരിങ്കൽപ്പടവുക
ളെന്നെ യൊന്നല്പം പിടിച്ചിരുത്തി

നീയെനിക്കേകിയ മഴവില്ലിനഴകുകൾ
നമ്മെത്തഴുകിയ മധുരമാം മാരുതൻ
പുതുമഴചാറ്റലിൽ മൊട്ടിട്ട തളിരുകൾ
പുസ്തകത്താളിൽ നാം സുക്ഷിച്ചപീലികൾ

നിന്മിഴിക്കോണിൽ ഞാൻ കണ്ടുള്ള ചിത്രങ്ങൾ
ഓർമയിൽ മറയുന്ന മധുരസ്മരണകൾ
എന്നുമോർക്കാൻ കൊതിക്കുന്ന നാളുകൾ

മനസ്സിലെവിടെയോ ചിതറിക്കിടന്ന
ഓർമപ്പൂക്കളെ പെറുക്കിയെടുക്കാൻ ശ്രമിച്ചിന്നുഞാൻ
ചിലതെല്ലാം അലിഞ്ഞില്ലാതായിക്കൊണ്ടിരിക്കുന്നുവെങ്കിലും.

ഓർമ്മകൾ പലതിനെയും കാലം കവർന്നെടുത്തേക്കാം 
മുഖാവരണങ്ങൾക്ക് പുഞ്ചിരിയെ മറക്കാനായേക്കാം എന്നാൽ
 കണ്ണുകളിലിന്നുമാ തിളക്കമുണ്ട്
 ചുവടുകൾക്കിന്നുമാ ലക്ഷ്യബോധമുണ്ട്