............................................................
മിട്ടായിപ്പൊതി പോലൊരു കുഞ്ഞു കഥയുണ്ട്
ഇന്നുമോർമയിൽ മായാതെ നിൽക്കുമൊരു
മധുരമൂറും മിട്ടായികഥ. അത്ര പെട്ടെന്നൊരു മാറ്റവും ഉൾക്കൊള്ളനാവുന്നില്ല എന്നതാകണം ഇന്നുമെന്റെ പരാജയം. അല്ലെങ്കിൽ ഞാനതൊക്കെ എന്നേ മറന്നു പോയീടണം.
അന്നെനിക്ക് ചുറ്റുമൊരു കുഞ്ഞു ലോകമുണ്ടായിരുന്നു.അത്രയും പ്രിയപ്പെട്ട കുറച്ചുപേരിലൊതുങ്ങുന്നൊരു കുഞ്ഞു ലോകം. സ്വയമൊരുക്കിയോരച്ചുതണ്ടിൽ അതിങ്ങനെ കറങ്ങിക്കൊണ്ടിരുന്നു. ഇഷ്ടങ്ങളും സ്വപ്നങ്ങളുമെല്ലാം അതിനുള്ളിൽതന്നെയൊതുങ്ങിയിരുന്നു. ആ കുഞ്ഞു ലോകത്തിലൊരു കോണിൽ ചെറു പുസ്തകത്താളിനുള്ളിൽ മിദ്യാസ്വപ്നം പോലെ വെളിച്ചെമേൽക്കാതെ ഒരു മയിൽപീലിയിരുപ്പുണ്ടിപ്പോഴും. ഒന്നുകൂടി താളുകൾ മറിയുമ്പോഴൊരു കോണിൽ ദ്രവിച്ചുതുടങ്ങിയൊരു മോഹത്തിന്റെ പ്രതീകം പോലെ പൊടിഞ്ഞു തുടങ്ങിയൊരാലില.
ഏറെ സ്നേഹത്തോടെ മധുരം പൊതിഞ്ഞൊരു മിട്ടായിപ്പൊതിയുമുണ്ടവിടെ . ഇന്നോളം പിടിതരാത്തൊരൊളികണ്ണിൻ മുന്നിലേക്കന്നു ഞാൻ നീട്ടിയൊരു മിട്ടായിപ്പൊതി. തിരിക്കെയുണ്ടാവില്ലൊരിക്കലുമീ കാലമെന്നറിയുമെങ്കിലുമെന്നും ഇന്നും മനസ്സാ കുഞ്ഞുലോകത്തിനു ചുറ്റിലും തന്നെ, ഞാനിന്നുമാ സ്നേഹമൂറും വർണക്കടലാസ്സിനുള്ളിൽ തന്നെ.
ആ കുഞ്ഞുലോകമിന്നും ഇടക്കിടക്ക് തുറന്നു നോക്കാനിഷ്ടപ്പെടുന്നൊരോർമചെപ്പ്. ഒറ്റക്കാകുമ്പോഴോർമയിലേക്കൊരു നീറ്റലായോടിയെത്തുന്നൊരു കുഞ്ഞുലോകം.
Hkm❣️
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ